Ég óska öllum gleðilegs árs og þakka fyrir það liðna. Árið sem var að líða var mjög viðburðaríkt hjá mér eins og mörgum öðrum. Hæst bar kosningabaráttan og kosningarnar i vor. Það var mjög lærdómsríkt að taka þátt í þeirri baráttu. Að fá að kynnast svona mikið af fólki og setja sig inn í málefni kjördæmisins og samfélagsins var mikil lífsreynsla sem á eftir að skila sér í framtíðinni í aukinni víðsýni og þekkingu. Ég þakka öllum þeim sem lögðu mér og okkur lið í baráttunni og þakka þeim fjöldamörgu vinum sem ég eignaðist víðsvegar um kjördæmið fyrir ánægjulega samveru á árinu, vonandi verða þær sem flestar í framtíðinni. 

Einn ráðherran er með, annar á móti, þriðji með og fjórði tvístígandi......og svo frv. Sama gildir um þingflokkana, þar eru skiptar skoðanir og mismunandi loforð voru gefin í kosningabaráttunni.

Þetta verður spennandi samstarf og greinilega ólíkt frá samstarfi X-B og X-D að því leiti að menn hlaupa nú í fjölmiðla fyrst og ræða málin síðan innan stjórnarflokkanna.

Ef ætlun hinnar nýju ríkisstjórnar er að klára deilumál í sambandi við Norðlingaölduveitu og Þjórsárver í eitt skipti fyrir öll þá hefði verið hægt að orða það með mun skýrari hætti í stjórnarsáttmálanum. T.d. Hætt verði við gerð Norðlingaölduveitu.

Setningin upp úr stjórnarsáttmálanum er hinsvegar eftirfarandi:

"Stækkun friðlandsins í þjórsárverum verði tryggt þannig að það nái yfir hið sérstaka votlendi hveranna"

Loðnara getur það ekki verið og einsýnt er að hin nýja ríkisstjórn vill halda öllu opnu í virkjanamálum sem og öðru. Það er mikið talað um það hjá stjórnarliðum að nýja ríkisstjórnin hafi burði og kjark til að koma málum á dagskrá.  Svona loðin stefna er ekki til merkis um mikinn kjark. Það hefði verið nær að koma skýrt fram og segja bara Þjórsárver eða ekki Þjórsárver.

Eðli stjórnarsáttmála er að vera dálítið opnir í báða enda og þar er ætíð að finna mörg faguryrði og stóryrði um að hverju skuli stefnt. Stjórnarsáttmáli X-D og X-S er þar engin undantekning. Það sem kemur mér samt á óvart er hvað lítið er þar sem hönd á festir. Þarna er farið inn á flest svið þjóðlífsins og allt á að bæta og efla en lítið um nánari skilgreiningar. Nokkuð mörg atriði vöktu athygli mína og þá sérstaklega hvað Samfylkingin hefur gefið gríðarlegan afslátt af sinni stefnu, allavega hvað varðar þau stóru orð sem komu fram í kosningabaráttunni. Það verður stórt og spennandi verkefni að vera í stjórnarandstöðu enda gefur stjórnarsáttmálinn tilefni til margra ágreiningsefna. Það eru fögur fyrirheit um sátt og samlyndi en ekki er ég viss um að þjóðin gleypi við öllu því sem að kemur frá þessari ríkisstjórn möglunarlaust. Það skyldi þó ekki vera að mikið ósætti eigi eftir að einkenna þjóðlífið á næstu misserum?

Inngrip auðvaldsins í kosningabaráttuna fyrir alþingiskosningarnar núna í vor er grafalvarlegt mál. Núna í kjölfarið er auðvelt að gleyma sér í því að benda á að Framsóknarflokkurin sé tapsár og sé að benda á að þessi aðför sem beindist að honum sé eina ástæða þess að illa fór. Það eru margar ástæður fyrir slæmri útreið flokksins í kosningunum og mikil vinna framundan í að byggja upp flokkinnn. En það má ekki líta á inngrip fjölmiðla á vegum Baugs og auglýsingu Jóhannesar eingöngu í því ljósi. Hverjir verða fyrir barðinu á auðvaldinu næst? Verður það kannski Samfylkingin? Hvað ef nýjir ráðherrar á þeim bæ láta sér detta í hug að að koma fram með auknar reglur t.d. um hringamyndun eða auknar reglur í sambandi við samkeppnismál? Verður þá útgefið blað sem ætlað er að draga úr trúverðuðleika þeirra? Getur verið að ótti við að styggja ekki Baug geri að verkum að ráðherrar veigri sér við að setja eðlilegar reglur á sviði viðskiptalífsins?

Eitt er víst að þetta ingrip sem átti sér stað vekur fleiri spurningar en það svarar. Það væri allavega ráðlegt að taka Framsóknarflokkinn og Baug út úr þessari umræðu og líta á heildarmyndina. Kannski verður það ÞÚ sem lendir næst undir hælnum á auðvaldinu. Hvað þá?

Greinin mín "Höfnum eignaupptöku" virðist hafa farið fyrir brjóstið á Jóni Bjarnasyni sem svarar með látum og segir mig leggjast lágt og vera með dylgjur og útúrsnúninga. Þetta er þekkt aðferð þegar fólk er komið í rökþrot að reyna að gera lítið úr andstæðing sínum. Enda kemur svo greinilega í ljós í svarinu að Jón er rökþrota og svarar ekki því sem lagt var upp með.

Greinin "Höfnum eignaupptöku" er hér á heimasíðuni undir Pistlar.

Nú er rétt rúmlega vika til kosninga. Pressan á stjórnmálamenn er mikil og taugarnar þandar til hins ítrasta. Það er á svona álagstímum sem hið rétta andlit stjórnmálamanna kemur ljós. Það kom mér ekkert sérstaklega á óvart að sjá hvernig Steingrímur J. brotnaði niður í sjónvarpinu í gær og datt í sitt gamla orðljóta far og byrja að niðurlægja fólk. Það er ekkert skrítið að VG vill stofna netlöggu en það kemur þeim afar illa fyrir þá að hinn almenni borgari geti farið á netið og skoðað ummæli sem fallið hafa áður og borið þau saman við það sem sagt er síðar. Það átti allavega vel við í þessu tilfelli. Hér er vísun í heimasíðu Björns Inga þar sem hann fer yfir svar Steingríms við spurningu úr sal.

Það var gaman að koma á Strandirnar. Fundurinn á Hólmavík var skemmtilegur og gaman að spjalla við fólk um stjórnmálin. Eftir fundinn lagaði ég bílinn eftir óhappið á Ennishálsi en hélt svo inn á Drangsnes. Þar ræddi ég aðeins við okkar fólk sem er eldklárt í slaginn og fullt baráttuhug. Sama má segja um Framsóknarfólk almennt á Ströndum en ég kom heimsótti nokkra bæi í bakaleiðinni og gaf m.a. okkar margrómaða framsóknarkaffi.

Það munaði litlu í dag að ég færi sama veg og Kiddi sleggja og Einar K. þegar ég missti stjórn á bílnum á Ennishálsinum á Ströndum. Var að koma niður bratta brekku sem í var mikill krapi og U beygja framundan. Ég sá fram á að ná ekki beygjunni þannig að stefnan var tekin á að reyna að fara sem beinast útaf til að velta ekki. Þegar ég var að nálgast brúnina var bíllinn kominn á það litla ferð að ég ákvað að beygja aðeins og keyra á skilti sem var í kantinum og viti menn það dugði og bíllinn stoppaði kominn með framendann aðeins yfir kantinn. Með lafandi bretti og beyglaðan framenda hélt ég áfram á Hólmavík þar sem ég náði að tjasla þessu eitthvað saman. Vonandi hangir það fram yfir kosningar.

Á föstudagskvöldið fórum ég og Magnús Stefánsson á sjávarréttarkvöld hjá ÍA. Kvöldið var vel heppnað í alla staði. Maturinn var frábær og mörg góð skemmtiatriði. Liðsmenn ÍA þjónuðu til borðs og stóðu sig vel í því. Það sem stóð uppúr kvöldinu var frábært skemmtiatriði sem Freyr Eyjólfsson flutti. Meginþemað hjá Frey var að búa til baráttusöng fyrir Skagamenn þar sem hann brá sér í líki margra frægra íslenskra tónlistarmanna sem reyndu fyrir sér í að búa til lagið. Síðan var uppboð til að safna fyrir liðið þar sem boðnar voru upp alls konar minningarvörur t.d. gamlar myndir og treyjur af frægum köppum. Ein gömul skagatreyja var t.d. boðin upp á 250.000.- Það verður gaman að fylgjast með skagaliðinu í sumar og næstu ár en þeir eru með ungt og efnilegt lið. Áfram Skagamenn – ekkert stopp.

Ég renndi aðeins í gegnum ályktanir sjálfstæðismanna frá landsfundinum um landbúnaðarmál. Þar kennir margra grasa. Það er tvennt sem stingur í stúf. Talað er um áframhaldandi verndun í einni málsgrein og svo að markaðslögmál eigi að gilda í annarri seinna. Þetta er skrítin framsetning og full ástæða að spyrja hvað átt sé við.

Annað er þó öllu verra en það er ályktunin um þjóðlendumál. Þar kemur fram eftirfarandi:

„... fagnar landsfundurinn þeim breytingum sem fjármálaráðherra hefur lagt til að gerðar verði á framkvæmd þjóðlendumála og að endanleg kröfugerð ríkisins í þeim málum sem nú eru í vinnslu taki mið af því.“

Þetta tel ég vera afar ósmekklega orðað og er einfaldlega mikil rangfærsla. Núna er komin kröfugerð í Þingeyjasýslum þar sem farið er fram með ýtrustu kröfur.  Jón Sigurðsson og Guðni Ágústsson hafa staðið í mikilli baráttu við fjármálaráðherra um að verklagi yrði breytt. Það gekk illa enda sjálfstæðismenn oft erfiðir í taumi og þráast lengi við þegar um brýn verkefni er að ræða. Nú koma þeir fram á landsfundinum og hæla Árna Matt í hástert fyrir vasklega framgöngu. Þetta er ekki Sjálfstæðisflokknum til sóma.

Stjórnarandstöðuflokkarnir eru óþreyttir að benda á óstjórn í efnahagsmálum og hafa búið til mörg stór slagorð sem lýsa því "ófremdarástandi sem þar ríkir". Aftur á móti eru þeir líka óþreyttir í að koma með stór loforð í að moka fé í velferðarkerfið og bæta alla þjónustu sem tilheyrir ríkinu. Til að rökstyðja hvernig á að standa undir öllum loforðunum benda þeir á sterka stöðu ríkiskassans og að það sé kominn tími til að moka úr honum einhverjum hundruðum miljarða í velferðarþjónustuna.

Er ekki kominn tími til að rökstyðja hvort atriðið er rétt

Þar sem mikið var að gera hjá mér í gær náði ég ekki að fylgjast mjög ítarlega með hvað var að gerast í kringum landsfund Samfylkingarinnar. Það sem ég þó sá gaf mér vísbendingar um að landsfundir þess ágæta stjórnmálaflokks verða valdar aðrar dagsetningar en föstudagurinn 13. í framtíðinni. 

Fyrst kom Össur í hádegisviðtalinu og með miklum sannfæringarkrafti talaði hann um að mannsaldursreynsla sín í stjórnmálum og yfirburðaþekking sín á að lesa úr skoðanakönnunum sýndi að allt væri á uppleið. Össur sýndi svo með skemtilegri handahreyfingu til að leggja áherslu á orð sín hvernig skoðanakannanir væru á uppleið....... 6 klst. seinna er birt könnun Gallup þar sem staðreyndin var á öfugan veg.....Óheppin... 

Á landsfundinn mættu svo skeleggir kvenskörungar frá Norðurlöndunum, þær Helle Thorning-Smith, leiðtogi Jafnaðarmannaflokksins í Danmörku og Mona Sahlin, nýkjörinn formaður Jafnaðarmannaflokksins í Svíþjóð til að styðja stöllu sína   Ingibjörgu Sólrúnu í komandi verkefni. Til merkis um þessa  „föstudagsins 13 óheppni „ í kringum landsfundinn, þá lýsti Sahlin því yfir í ræðu á fundinum að til að koma jafnaðarmannastjórn að völdum, þyrfti konu. Þetta vekur ákveðna furðu að heyra því að þessar stöllur þrjár, Sahlin, Ingibjörg og Helle Thorning-Smith eru allar í stjórnarandstöðu.   Þannig að þetta módel er ekki alveg að virka...Óheppin...

Síðan sá ég Kastljósið í gær yfir kvöldmatnum og verð að segja að þar átti Kristrún Heimisdóttir alveg hræðilegan dag. Ekki ætla ég að vera að velta henni upp úr hvernig til tókst í gær...kannski einhver yfirspenna eftir að koma af miklum baráttufundi...eða bara...Óheppin...

Annars bendi ég á greinina mína hér á síðunni frá í gær „Föstudagurinn 13.“ En þar útskýrist vel af hverju fólk ætti að hugsa sig tvisvar um að treysta á lukkuna á þessum degi. Sérstaklega kannski þegar um er að ræða heilu stjórnmálaflokkana mánuði fyrir kosningar J

Ég og Herdís Á. Sæmundardóttir erum að fara fljúga til Ísafjarðar núna í morgunsárið og verðum fyrir vestan fram á fimmtudag. Verð í netsambandi og skrifa um það sem á daga okkar drífur þar.

Kominn er nýr pistill inn á síðuna sem heitir "Mikilvægi Framsóknarflokksins" Nú hef ég farið víða um kjördæmið og hitt mikið af fólki. Fólk er yfirleitt mjög jákvætt í garð Framsóknar og skynjar mikilvægi flokksins í litrófi stjórnmálanna. Flokkurinn hefur staðið sig vel í velferðarmálum og miklar umbætur hafa átt sér stað í þeim málaflokkum. Þær mestu í íslandssögunni á síðustu árum.

Hvað skyldi það vera sem stjórnarandstaðan talar ekki um? Miðað við hversu mikill tími hefur farið í málþóf og ef skoðaðir eru ræðutímar allmargra stjórnarandstöðuþingmanna þá mætti halda að fátt sé ónefnt þar. En svo er nú alls ekki.

Það er mál manna að flokksþing Framsóknarflokksins í byrjun mánaðarins hafi markað ákveðin tímamót. Andinn á flokksþinginu var áberandi góður og mikil samstaða og samhugur ríkti á meðal fólks. Flokksmenn voru mjög samstíga og bera ályktanir flokksþingsins skýr merki grundvallarhugsjónar Framsóknarflokksins sem byggð er á samvinnuhugsjóninni og hollustu við land og þjóð. Ánægjulegt var að sjá eldri flokksmenn fylgjast með og var greinilegt á svip þeirra og viðbrögðum að þeir voru sáttir með gang mála. Framsóknarflokkurinn er svo sannarlega að ná vopnum sínum aftur og mætir sterkari en nokkru sinni til leiks í kosningabaráttuna.

Aðförin að Siv Friðleifsdóttur hefur verið með ólíkindum nú upp á síðkastið. Aðförin að persónu ráðherrans hefur einkennst af aðdróttunum um spillingu, óheiðarleika og óheilindi.

Í fréttunum á RÚV í gær kom svo hið rétta í ljós . Siv gerði ekkert rangt og eldri borgarar  viðurkenndu mistök sín og báðu „kurteislega“ afsökunar.

Nú verður gaman að sjá hvort þeir sem harðast hafa farið fram í þessum málum og m.a. heimtað afsökunarbeiðni og afsögn ráðherrans biðji Siv afsökunar og segi sig þá af framboðslistum í kjölfarið.

Ég held að samfylkingin þurfi allavega að hugsa vel sinn gang eftir að hafa birt auglýsingu á bls.11 í Fréttablaðinu þann 26. Mars. Þetta var ómerkileg og ómálefnaleg auglýsing sem aðeins byggði á ósannindum og hræsni.

Stundum er erfitt að átta sig á stjórnarandstöðunni. Allt kaffibandalagið vildi auðlindaákvæði tengt sjávarauðlindinni inn í stjórnarskrá. Síðan kemur tillaga að auðlindarákvæði sem nær til allra auðlinda og þá eru allir á móti því. Hvernig ætla þeir að vinna saman eftir kosningar.....sameinast um að leggja fram mál á mánudegi og sameinast um að fella það á þriðjudegi.....Eitt mega þau þó eiga að það er að þau eru samstíga núna, bara samstíga í vitleysunni. Annars á samfylkingin eftir að samþykkja þetta fljótlega, það var nefnilega að koma skoðanakönnun sem sýndi að mikill meirihluti þjóðarinar vill fá þetta ákvæði inn í stjórnarskrána.

Nú um síðastliðna helgi var flokksþing Framsóknarflokksins haldið. Á þinginu ríkti eftirtektarverð samstaða og greinilegt að þær breytingar sem orðið hafa á forystu flokksins hafa skilað góðum árangri. Þingfulltrúar samþykktu metnaðarfullar ályktanir og málefnastaða flokksins er sterkari sem fyrr og verður gaman að vinna að þeim málefnum í kosningabaráttunni. Greinilegur vilji kom fram á þinginu að styrkja stoðir velferðarkerfisins á komandi kjörtímabili. Ég fékk það skemmtilega hlutverk að leiða menntamálanefnd á þinginu. Metnaðarfullar og framsýnar tillögur komu fram í nefndinni og voru samþykktirnar glæsilegar. Ég vek athygli á kafla sem fjallar um íþrótta, tómstunda- og æskulýðsmál en ár koma fram nýjungar sem skipta allt íþrótta- og félagsstarf á landinu gríðarlega miklu máli. Ályktanir flokksþingsins má finna HÉR

Vísnagleði hefur ætíð fylgt landanum. Þessi hefð er afar skemmtileg og ekki síst vegna þess að í vísum er oft hægt að ná fram aðalatriðum úr umræðu á mjög snaggaralegan hátt. Í stjórnmálum og kringum þau koma oft upp skemmtileg atvik og aðstæður sem vísnaglaðir grípa á lofti og yrkja um. Til að hleypa smá meira lífi í síðuna þá ætla ég að birta vísur hér á forsíðunni þegar mér berast slíkar.

Fyrsta vísan sem ég birti samdi sá mikli höfðingi Bjarni Valtýr Guðjónsson í kjölfar ræðu minnar á flokksþingi Framsóknar 2. Mars 2007.  Bjarni er einn af perlum okkar samfélags, mikill félagsmaður og góður vinur. Aldrei hef ég kynnst nokkrum manni með jafn mikla þjónustulund og Bjarna. Á uppeldisárum mínum vann hann hjá Kaupfélagi Borgfirðinga, bæði í matvörudeildinni og svo í byggingavörudeildinni. Ef einhvern vantaði eitthvað þar, þá var hægt að stóla á að Bjarni leysti málið á besta mögulega tíma.

Vísan er svo hljóðandi:

Vesturlandsins Valdimar

Vekur andans heppni.

Skerpir brandinn skýrt með svar

Skal ei stranda í keppni

Á síðustu árum hefur verið mikið fjallað um jafnréttismál og þá oft út frá þeirri staðreynd að hallað hefur á konur á ýmsum sviðum.  Athyglisvert er þó að einungis einn stjórnmálaflokkur á Alþingi, Framsóknarflokkurinn hefur svarað kalli tímans hvað þetta varðar. Ráðherralista framsóknar skipa þrjár konur og þrír karlar. Þingflokk framsóknar skipa fimm konur og sex karlar. Framboðslista framsóknar fyrir alþingiskosningarnar 2007 skipa 63 konur og 63 karlar. Þrjár konur og þrír karlar leiða lista framsóknar fyrir alþingiskosningarnar 2007. Í fyrstu fjórum sætunum fyrir alþingiskosningarnar 2007 eru 13 konur og 11 karlar. Svona mætti lengi telja og niðurstaðan ætíð fullt jafnrétti.

Þessi staðreynd vekur sérstaka athygli fyrir þær sakir að forsvarsmenn annarra lista en framsóknar standa á torgum þessa dagana, mála allt bleikt og hrópa hátt um það hversu mikinn sess jafnréttismál skipa í stefnu þeirra.

Það hljómar sem merkingarlaust blaður í mínum eyrum....eyðið frekar tíma og orku ykkar í að taka til heima hjá ykkur.......

Á fimmtudaginn síðasta flutti ég pistil og má lesa hann í heild sinni undir pislum - Nýjar raddir 1 hér á síðunni.

www.bb.is 

www.strandir.is 

www.huni.is   

Vikan komin inn, er samt að spá í að færa daglega inn en ekki safna upp heilli viku og setja svo inn. Vona að ég geti staðið við það.

Tvær greinar sem ég skrifaði og birtust á landshlutafréttavefjunum eru komnar í pistlana. Neðst í báðum pistlum eru svo tenglar beint inn á viðkomandi grein.

Hef fengið gríðarlega góðar undirtektir við síðustu frétt sem ég setti inn á vefinn en þar safnaði ég saman fréttavefum kjördæmisins. Fékk ábendingu um nokkra til viðbótar og set þá jafnóðum inn í linkasafnið. Endilega bendið mér á ef það vantar fleiri.

Norðvestur kjördæmi er víðfermt. Mörg byggðarlög eru sameinuð í þessu stóra kjördæmi. Til þess að hafa puttann á púlsinum er því nauðsynlegt að kynna sér vel þá fréttavefi sem haldið er úti. Hér eftir ætla ég að telja þá vefi upp sem ég heimsæki reglulega, eða oft á dag þessa dagana til að kynna mér hvað er í gangi á hverjum stað.

www.skessuhorn.is  Fréttavefur Vesturlands

www.bb.is  eða Bæjarins besta sér um Vestfirskar fréttir

www.strandir.is  Skemmtilegur og göldróttur fréttavefur Strandamanna

www.huni.is  Húnahornið úr Húnavatnssýslunum

Ég hvet alla til að kynna sér þessa metnaðarfullu fréttavefi og kynna sér málefni byggðarlaganna. Þarna gefst okkur frambjóðendunum einnig kostur að kynna okkur og málefni okkar. Ég vona að ég sé ekki að gleyma neinum en ef svo er þá endilega látið mig vita með að senda mér póst.

Kæri lesandi!

Velkominn á heimasíðuna mína valdimar.is.  Aðalástæða þess að ég set upp þessa heimasíðu er að kynna mig og málefni mín í aðdraganda prófkjörs Framsóknarflokksins í Norðvesturkjördæmi. Ég hef boðið mig fram í þriðja sæti á þeim lista og vonast eftir því að hljóta stuðning flokksmanna minna til að skipa það sæti. Af þessari ástæðu er aðalefni síðunnar tengt þjóðmálunum á einn og annan hátt.

Allir pistlarnir eiga að vera stuttir og gagnorðir enda er það í mínum anda að koma efni frá mér í sem stystu máli þar sem aðalatriðin eru ekki falin á milli þess sem minna skiptir máli. Vona ég að þú lesandi góður eigir eftir að njóta þess sem hér er skrifað og heimsækja síðuna reglulega og sjá hvað ég hef fram að færa.
kær kveðja
Valdi